நாகம்

ஆதிசேடன் கார்கோடகன் இருபெரும் நாகங்கள்

ராகுவும் கேதுவும் நாகத்தின் தலை வால்

ஜாதகத்தில் நாகம் தடையாகும்

ஐந்து தலை நாகம் அணை; காட்டு நாகம் கழுத்து மாலை எம் கடவுளருக்கு

புற்றடிக் கோயில்களில் நாகங்களும் கடவுளர்

பாம்பின் பகையுறவு பருந்தும் பகவான்தான்

பாம்பில் படுத்துறங்கிய பெருமான்

பருந்து வாகனத்தில் பவனி வருகிறார்

புற்றடிக் கடவுள்கள் சாமான்யனுக்கு - புற்றடிக்

கடவுளரின் கடவுள்கள் சமர்த்தர்களுக்கு - எனினும்

இவை ஏதுமறியா நாகம் பல்லிழந்து

படமெடுத்தாடியது பாம்பாட்டி மகுடி முன்.

திசை

நால்திசை  பார்த்தமர்ந்தார் பிரம்மா

தென்திசை பார்த்தமர்ந்தார்  சிவன்

வாஸ்துவின் திசையில் வாசல்கள்

ஆகாத திசை சொல்லும் நாள்காட்டி

வலப்புறம் என்பதும் இடப்புறம் என்பதும்

திசையறியா மனிதர்களின் திசைகள்

கடலில் திசையறிய காந்தக் கைகாட்டி

வட இமயம் தென்குமரி

மேற்குமலை இன்ன பிற

கிழக்கிலிருந்து மேற்காகவோ

மேற்கிலிருந்து கிழக்காகவோ சுற்றும் பூமியின்

வடதிசையில் வடதுருவம்

தென்திசையில் தென்துருவம்- எனில்

சூரியனின் திசை எது? 

 வனம் சுமந்த குளுமை


வானம் அளந்த திமிர்


பெருங்காற்றின் முழுச்சுதந்திரம்


தன் சேயணைத்த தாய்மை


ஒரு மழைக்காலத்தின் நீர்மணிகள்


புதியது கொண்டு


பழையது தள்ளும் தன் லாவகம்


ஒரு ஒய்வு நேர சுத்தப்படுத்தலின் மிச்சம்


திடீரென விடுபட்ட தனிமை


ஒரு மதிய நேர இளங்காற்று


சிறு கூட்டின் கதகதப்பு


மெல்லியல்பில் இரும்புறுதி


இவற்றில் எதைச் சொல்கிறது,


ஓர் ஒற்றை யிறகு?